Ragnheiður Eiríksdóttir fræðir fyrirlestrargesti um dægurlagatexta í kvöld

Fréttablaðið
13. November 2007
Dægurlagatextar og þjóðarsálin
Mannfræðifélag Íslands stendur í vetur fyrir fyrirlestraröðinni Frásögn – Túlkun – Tengsl. Næsti fyrirlestur fer fram í kvöld kl. 20 á efri hæð kaffihússins Kaffi Sólon, Bankastræti 7a.
Yfirskrift fyrirlestrarins er „Þau minna á fjallavötnin fagurblá – Um dægurlagatexta og samfélag á seinni hluta tuttugustu aldar." Þær Kristín Einarsdóttir þjóðfræðingur og Ragnheiður Eiríksdóttir tónlistarmaður fjalla þar um áhrif dægurlagatexta frá ýmsum sjónarhornum.
Dægurlög og textar sem þjóðin gerir að sínum og syngur á böllum, í rútuferðum, í útilegum og fjallaskálum, eru í raun hinn rétti skáldskapur þjóðarinnar. Það er fólkið í landinu sem ákveður hvað fellur þjóðarsálinni í geð, hitt hverfur; jarðvegurinn hafnar því og það nær ekki að skjóta niður rótum. Vinsældir dægurlaga og dægurlagatexta gefa þannig til kynna að þessi verk eigi erindi í sinn samtíma.
Í fyrirlestrinum er leitast við að skilja hvaða samfélag það er sem birtist í vinsælum dægurlaga textum. Hverjar eru hetjurnar, hver er staða konunnar, hverjar eru vonir og þrár þeirra sem sungið er um eða sungið er til?
Kristín Einarsdóttir er með meistarapróf í þjóðfræði frá HÍ og starfar hún nú sem stundakennari við þá stofnun. Ragnheiður Eiríksdóttir er landsþekktur tónlistarmaður og er líkast til betur þekkt sem Heiða Eiríks.
Fyrirlesturinn er öllum opinn.